Interea, rapidas perfusa cruoribus alas, Sicut sanguinea Trasymeni tinxerat unda, Vera ac ficta simul spargebat Fama per urbem. Allia, et infandi Senones, captæque recursat 555 Adtonitis arcis facies: excussit habenas Luctificus Pavor, et tempestas aucta timendo.
552 sq. Tandem poeta in viam redit, de qua inde ab initio hujus libri declinaverat. De ingenti terrore ac tumultu, Romæ ad primum cladis nuncium orto, vid. Liv. XXII, 7; Polyb. III, 85, et Appian. bell. Hannib. c. 11, extr. Silius autem narrationis colores hoc loco a Virgilio Æneid. IV, 173 sq. (ubi vid. Heyne) inprimis vss. 180, 188, 190, sumsit, et bene cruentas alas, in Trasymeno lacu tinctas, Famæ tribuit. 555. Cf. ad I, 547. --_recursat_ animo, ut ap. Virg. Æn. IV, 3. 556. _excussit habenas_, ut IV, 681, et ap. Virg. Æn. V, 662; XII, 499, h.l. præclare de pavore, totum animum inplente ac pervadente. 557. _tempestas_, calamitas et periculum. --_aucta timendo_. Cf. ad IV, 8. [559.] _Hostis adest_, nota excubitorum exclamatio. Vid. Burm. ad Val. Fl. III, 45.
554. _Fama_ et mox _Pavor_ majoribus literis init. scripsi, ut personæ sint, _per orbem_ Ox. Put. R. 3, Parm. Med.
Hinc raptim ruit in muros: vox horrida fertur, Hostis adest; jaciuntque sudes et inania tela. Ast aliæ, laceris canentes crinibus, alta 560 Verrunt tecta Deum, et seris post fata suorum Sollicitant precibus: requiem tenebræque diesque Amisere: jacent portis, ululante dolore,
560 sq. Cf. Liv. XXII, 7. In luctu ingenti matronis solenne fuit, non capillos tantum spargere et vellere, sed crinibus quoque passis aras ac templa verrere, πλύνειν. Cf. XIII, 311; Liv. XXVI, 9, et alia loca, a D. Heins. Dausq. et Drakenb. adscripta. 562. _Sollicitant precibus_, scil. deos. --_Requiem tenebræque diesque Amisere._ Romani nec die, nec noctu sine cura quiescunt. 563. Propr. homines dolore _ululant_. Cf. quos Lefeb. laudat Sen. Herc. fur. 693; Stat. Th. III, 158, 272.
558. _Hinc_, scilicet ex urbe tempestas _ruit_, Oxon. quod suadente N. Heins. recepit Drak. Vulgatum _Hic_ servavit Lefeb. ut _hic_ ad viros, et _aliæ_ v. 560, ad mulieres spectet. 559. _jaciuntque_ omnes scripti et R. 2. Vulgo _jaciunt_, quod metro ad versari fatetur etiam Dausq. 561. _Vertunt_ Ox. et Put. cum nonnullis edd. vitiose, ut passim. 563. _jacent_, non _jacet_, Oxon. et Puteol. cum priscis edd. ante Basil. conf. ad III, 222 et 288, _stimulante dolore_, vel _vulgantque dolorem_, vel _cumulantque dolorem_, vel denique, quod Drakenborgh in contextum recepit, _ululantque dolore_ tentabat N. Heins. cui tamen postremo nil mutandum videbatur. Recte! vid. not.
Dispersum vulgus, remeantumque ordine longo Servat turba gradus; pendent ex ore loquentum, 565 Nec lætis sat certa fides, iterumque morantur Orando; et, vultu interdum, sine voce, precati, Quod rogitant, audire pavent. Hinc fletus, ubi aures Percussæ graviore malo: metus inde, negatum Si scire, et dubius responsi nuntius hæsit. 570
564. Ingens populi turba æquo cum remeantibus ex prælio gradu incedit, ut ex iis suorum fortunam cognoscant, Drak. coll. Liv. XXII, 7, quem locum Silius egregie exornavit. Cf. ad VII, 362. 565. _Servat_, observat, judice D. Heins. ad III, 380. Male!--_pendent ex ore loquentum_; attente, indesinenter, oculisque non reflexis contemplantur, ut ap. Virg. Æn. IV, 79, et infra. VIII, 93, ubi vid. Drak. Cf. ad VII, 362. 566. ≪Proprium hoc miseros sequitur vitium, Nunquam lætis credere rebus,≫ Senec. a Dausq. laud. 567. _Orando_, dicendo, loquendo, adeoque et interrogando. 569. _Percussæ aures_; cf. ad II, 580.
564. _reboantumque_ et v. 567, _Quærendo_ conj. N. Heins. Sed cave quidquam mutes. 568. _Hinc_ semper scribendum putavi, non _hic_, quia _inde_ sequitur; et nunc Lefeb. id reposuisse video, cujus exemplum secutus sum. 569. _Perculsæ_ Tell.
Jamque ubi conspectu redeuntum visa propinquo Corpora, sollicite læti funduntur, et ipsis Oscula vulneribus figunt, Superosque fatigant.
571 sq. _redeuntum Corpora_, h.e. redeuntes, ut VII, 358; XIV, 105; Virg. Æn. II, 18; VI, 22. 572. _læti_, ob reditum suorum, sed simul _solliciti_ propter vulnera visa, Cell. et Drak. Cf. ad III, 215. --_funduntur_, ut circumfunduntur apud Liv. XXII, 7, vel ut sup. II, 151. 573. _Oscula vulneribus_, signis virtutis, _figunt_. Comparant Tac. Germ. 7, extr. ≪Ad matres, ad conjuges vulnera ferunt: nec illæ numerare, aut exigere plagas pavent.≫ Cf. IX, 350. --_fatigant_ sc. precando, ut vulnera non sint mortifera, et gratias agendo, ob reditum; ut _lacessere deos_. Cf. Drak. ad h.l. Broukh. ad Prop. II, xiii, (al. 20) 3; Interpp. ad Hor. Od. I, ii, 26; II, xviii, 12, et sup. ad I, lxiii, 675; II, 75.
571. _redeuntum_, vel _redeuntia_ pro vulg. _redeuntis_ emend. Dausq. et N. Heins. Hoc recepit Drak. illud. nos cum Lefeb. cujus nota est hæc: ≪In antiquis fuit _redeuntu pro redeuntū_: hinc, neglecta nota, _u_ sæpe mutatur in _is_, et scriptum _redeuntis_ a librariis. Sine fide Drak. _redeuntia_, quod in nullo veteri vidi.≫ Sed in quonam veteri vidit _redeuntum_?--572. _sollicite læti_ Col. Marsus et post hunc alii, _sollicitæ læti_ Parm. _sollicite læti_ Med. _sollicitæ leti_ et _sollicite lethi_ in reliquis libris, _adfunduntur_ emend. N. Heins. ut IV, 251; V, 66 al. Sed vid. not.
Hic inter trepidos, curæ venerandus, agebat Serranum Marus; atque olim post fata mariti 575 Non egressa domum vitato Marcia cœtu, Et lucem causa natorum passa, ruebat In luctum similem antiquo: turbata repente Agnoscensque Marum, ≪Fidei comes inclite magnæ, Hunc certe mihi reddis, ait. Leve vulnus? an alte 580 Usque ad nostra ferus penetravit viscera mucro?
574 sq. Marcia, viso Maro, qui Serranum Reguli filium ex acie reducebat, hunc certe sibi redditum gaudet; de vulnere tamen anxia inquirit, num id leve sit, an vero altum, Drak. --_curæ venerandus_, ut XVI, 248. --_agebat_, adducebat: adlevans et sustinens, quia Serranus vulneribus tardior ibat, Dausq. 577. _lucem passa_, vitam sibi invisam acerbamque etiamnum pertulerat, nec sponte posuerat, ut maritum sequeretur, amore filiorum mota. Cf. Burm. ad Val. Fl. V, 571. 578. _similem antiquo_, quum captivus et occisus esset maritus. 579. _Fidei magnæ_, fide antiqua, vel docte pro, Reguli. 581. _ad viscera nostra_, filii mei, et sic ad mea quoque. Cf. VV. DD. ad Virg. Æn. VI, 834. --_viscera_ poetis liberi dicuntur. Cf. Ovid. Met. VI, 651; X, 465, et Ep. Her. XI, 90, 118. Ceterum hæc et reliqua Marciæ verba ad anxias matris curas, et tenerrimum amorem adumbrandum egregie comparata sunt.
574. _Hinc_ quædam edd. antt. probb. Marso et Cell. ut sensus sit: hinc Romam reducebat ad matrem. 576. _Marcia_, non _Martia_, Col. vid. ad v. 403. 577. _haud passa_ oræ libri sui adscripserat Scalig., non, quod Cell. credebat, N. Heins. 580. _Hunc_, scilicet filium, Col. et R. 2. Vulgo _Nunc_ legitur, et, quod N. Heins. jam observavit, male interpungitur, _inante_ pro _an alte_ conj. Dausq. sublatis interrogandi notis, ut sententia h.l. sit: nunc reddis leve vulnus, quod _inante_, h.e. ante, altissimum. Sed voc. _inante_ boni ævi Latio receptum non fuisse, monet Drak. et quos laudat, Gronov. Obss. I, 15, Burm. ad Ovid. Met. II, 524, IX, 325, et Broukh. ad Prop. II, ii, 52, etsi illud vindicare conati sunt Gebhard. Crepund. II, 5; Scipio Gentil. Parerg. I, 14, et Aus. Popma de usu antiq. locut. c. 14. Nonnulla, quibus Marcia filium adgnoverit, excidisse putabat Barth. Adv. I, 13.
Quidquid id est, dum non vinctum Carthago catenis Abripiat, pœnæque instauret monstra paternæ, Gratum est, o Superi! quoties, heu! nate, petebam, Ne patrias iras, animosque in prælia ferres; 585
582. _Quidquid id est_, cf. V.L. 583. _pœnæ monstra_, vid. ad II, 650. 584. _Gratum est, o Superi!_ solennis formula flebile gaudentium, quum tamen aliquid est læti in tantis malis; quod docuere, a Drak. laudati, Gron. Diatr. Stat. c. 16. et ex eo Broukh. ad Tibull. IV, 10 pr. 585. Ut VIII, 328, Drak.
582. _Quidquid id est_, h.e. quidquid vulnerum filius sustinet, scripti cum R. 3, Parm. Med. ne inprob. quidem Dausq. conf. ad v. 119. _Quidquid adest_ Marsus, et post eum alii.
Neu te belligeri stimularet in arma parentis Triste decus? Nimium vivacis dura senectæ Supplicia expendi: quæso, jam parcite, si qua Numina pugnastis nobis.≫ At cladis acerbæ Discussa ceu nube, Patres conquirere fessis 590 Jam rebus meditantur opem; atque ad munera belli Certatur, pulsusque timor graviore periclo.
586 sq. _parentis decus_, gloria, _triste_, ob eventum. 588. _Supplicia expendere_, h.e. pendere, solvere, ut VII, 713; XIII, 698; Virg. Æn. VI, 740; X, 669; XI, 258; Dausq. et Drak. --_jam parcite_, nunc demum ira vestra resideat, quum jam decrepita sim. 589. _pugnastis_, adversa fuistis, et infesta. 590. _Patres_ solos nihil, quod a sua dignitate alienum esset, commisisse, tradit Polyb. III, 85, extr. 592. _graviore periclo_, ejus metu: ne scil. Hannibal Romam veniret, Cell.
586. _Neu_, non _Nec_, Colon. vel potius, teste Lefeb., tres scripti et R. 2. 589. _At_, non _Hac_, Colon. In eodem _Discissa_, probb. N. Heins. et Lefeb. quibus tamen nec vulgata displicebat. 592. _timor_ scripti et R. 2. Vulgo _dolor_, quod retinuit, et tam in duobus scriptis, quam in priscis edd. legi testatur Lefeb. qui frustra tamen provocat ad Virg. Æn. VI, 382.
Maxima curarum, rectorem ponere castris, Cui Latium et moles rerum quassata recumbat, Spectante occasum patria. Jovis illa ruenti 595 Ausoniæ, atque Italis tempus protendere regnis Cura fuit: nam Tyrrhenos, Pœnumque secundis Albana surgens respexerat arce tumentem, Qui ferre in muros victricia signa parabat.
593. _ponere_, dare, ut ap. Virg. Æn. VII, 63, vel adponere, subornare, constituere, ut τιθέναι pro διατιθέναι. Sic _custodem frumento_, et _judicem_, vel _accusatorem alicui ponere_ dixit Cicer. Flacc. 19; Sull. 28, et ad Div. VIII, 12. 595 sq. Jovis tonitru Hannibal perterrefactus a consilio Romæ obpugnandæ revocatur (ut ap. Appian, b. Hannib. c. 12, pr. θεοῦ παραγαγόντος αὐτὸν), ejusque instinctu Fabius, tantus vir, dux belli creatur. Utraque res digna erat, quæ numinis ministerio expediretur. Romani enim hostis adventum adeo timebant, ut contrarium, sine deorum ope, vix sperarent; nec dux superesse videbatur, a quo arceri, nedum vinci posset. Alias tamen causas, cur Hannibal Romam nondum adcesserit, adferunt Liv. XXII, 9, et Polyb. III, 86. Cf. ad v. 605 et 609. 597. _Tyrrhenos_, Etruriam, ubi cladem adceperant Romani. Cf. ad IV, 719, et V, 11 sq. 598. _tumentem_, οἰδαίνοντα, _secundis_ rebus. Vid. ad II, 288. --_Albana arce_, monte, qui cum dilectu ponitur, quoniam in eo templum Jovis Latiaris erat, in cujus honorem feriæ Latinæ quotannis haberi, taurusque immolari solebat, de quo loca class. sunt Dionys. Hal. IV, 6, p. 250, et VI, p. 366; Cf. Virg. Æn. XII, 134 sq; Cic. Mil. c. 31; et sup. ad I, 26. 599. _muros_ Romæ.
Tum quassans caput, ≪Haud unquam tibi Jupiter, inquit, 600 O juvenis, dederit portas transcendere Romæ, Atque inferre pedem. Tyrrhenas sternere valles Cædibus, et ripas fluviorum exire Latino Sanguine fas fuerit: Tarpeium adcedere collem, Murisque adspirare veto.≫ Quater inde coruscum 605 Contorsit dextra fulmen, quo tota reluxit Mæonidum tellus, atramque per æthera volvens Abrupto fregit cælo super agmina nubem.
600. _quassans caput_, κινήσας κάρη Hom. Odyss. ε, 285. 603. Propr. sanguis et aquæ eo infectæ exeunt ripas. 605. _Muris adspirare_, ut ap. Virg. Æn. XII, 352; Lefeb. cf. ad V, 270; cf. Hom. Iliad. ῥ, 593 sqq., ubi similiter iratus Jupiter fulminibus terrorem incutit Achivis. --_Quater_, ut _ter_ ap. Virg. Æn. VII, 141. 607. _Mæonidum tellus_. Etruria, ubi Hannibal erat. Vid. ad IV, 719 sq. 608. _Abrupto cælo_, vid. ad I, 135 et 535.
600. _Tum quassans caput_, ut in simili loco Virg. Æn. VII, 292, ex c. Tell. recepi cum Lefeb. Vulgg. _Tunc_, vid. ad v. 299. _Tibi, Jupiter inquit, O juvenis, dederim_ etiam legi posse monuit Drak. quod recepit Lefeb. quem tamen sup. v. 262, personarum permutatio, quæ optimis poetis in deliciis est, non offendit. Non equidem intercedo, quo minus _dederim_ rescribatur, sed tum interpunctio retinenda, verbaque _Jupiter dederim_ jungenda videntur, conf. ad v. 262. 601. _transcindere_ e c. Tell. reposuit Lefeb. ut sit id. qd. _frangere_ et _perfringere portas_ inf. X, 603, et XIII, 255. 604. _accedere_ scripti, quod, quum Hannibal revera _T. collem_, h.e. Romam adcesserit (vid. XII, 565), adscendere interpretatur Drak. qui ad exempla, a Gifanio Obss. ad ling. lat. prolata, provocat, et vel insolentiorem vocis vim librariis fraudi fuisse, vel vulgatam lect. glossema esse existimat. Sed possis etiam explicare: in Capitolium, sedem meam, venire. Vulgatum _adscendere_ e scripto, nescio quo, et priscis edd. revocavit Lefeb. qui v. 601, _transcindere_ poetæ obtruderat, et ad III, 510, respici arbitratur, a quo loco nostra tamen lectio non abhorret. Ceterum haud multum abfuit, quin refingerem: _T. adcendere collem_, h.e. Capitolium, vel ipsam Romam. Hinc utraque illa lectio facile nasci potuit incuria librar. vel ab his substitui, ne _collis adcendi_ diceretur. Conf. inf. v. 712, 713. 605. _Murisve_ emend. Lefeb. et _ve_ pro _immo_ positum putat. Mox _corusca dextra_ concinnius foret, ut ap. Virg. Ge. I, 328, et Horat. Od. I, ii, 2. Nec tamen quidquam mutare ausim: cf. Bentl. ad Hor. Od. III, iv, 44.
Nec Pœnum avertisse satis: dat numine magno Æneadis, gentem gremio deponere tuto 610 Romuleam tandem, Fabioque salutis habenas Credere ductori. Cui postquam tradita belli Jura videt: ≪Non hunc, inquit, superaverit unquam Invidia, aut blando popularis gloria fuco, Non astus fallax, non præda, aliusve cupido. 615
609. _dat_, indit, inspirat, _mentem_ Romanis, ut Venus Æneæ ap. Virg. Æn. XII, 554, ubi vid. Serv. et Heyne. Conf. ad I, 63, et Intpp. ad Val. Fl. IV, 568. 610. _gremio deponere tuto_, ut ap. Virg. Æn. VII, 233, et inpr. IX, 261. Origo formulæ satis nota. Lef. laudat Suet. Calig. c. 25; Terent. Adelph. III, ii, 35, et Bernart. ad Stat. Th. I, 60. Cf. V.L. 611. Pro _tandem_, Withof. conj. _volucrem_ (hoc est aquilam, imperii insigne), vel _causam_, vel, quod multum præstat, _molem_, ut sup. v. 594, Cui _Latium et moles_ rerum q. _recumbat_, (cf. v. 652, et VIII, 8) et _Romanæ pondera molis, moles Romani nominis_, et similia apud Ovid. Trist. II, 231; Tacit. Ann. I, iv, 11; Stat. Silv. V, i, 84; Aur. Vict. Cæs. c. 19; Curt. X, 5; sup. III, 604; XI, xxvii, 310, et aliis locis quæ laudarunt Zinzerl. Promuls. c. 45 et inpr. Burm. ad Petron. c. 120, p. 569. Idem vir doctus monet, voc. _tandem_ etiam sup. I, 662, turbas olim movisse, et _molem_ facile sic corrumpi potuisse ob ultimas syllabas proximæ vocis _Romuleam_. --_Fabioque_, etc. Cf. Liv. XXII, 8, et Polyb. III, 87. --_salutis habenas_ summam reip. servandæ curam. Vid. ad I, 144. 613. Splendidus de Fabio, ejusque ingenio, invicta constantia, aliisque virtutibus, et generis nobilitate locus. Cf. I, 679 sq., et ad VII, 413 sq. 614. _fuco_, dissimulatione et _blanda_ oratione. Flaminium, qui V, 77, _egregius linguæ_ dicitur, his verbis carpi suspicatur Lefeb.
609... 611. _dat n. m, Æneadis, gentem g. d. t. R. tandem_, corrig. Drak. Sic quoque Lef. nisi quod _tandem g. d. t. R. gentem_ audaciori conj. reposuit, addita hac nota: ≪Sensus est, tandem post tam funestas clades concedit, ita facit Jupiter, ut Æneadæ deponant gremio, etc. Quo nil clarius, nihilque minus perspectum omnibus editoribus. Æternus forem, (!!) si eorum nugas hic ventilarem. Pro _tandem_ legit Drak. _mentem_ contra fidem scriptorum, et v. seq. _tandem_ absurde pro _gentem_. Non dixit poeta _dat mentem_, sed _dat deponere_, ut _dat habere_, ne alia sexcenta adferam (vid. ad I, 3, IV, 716, et V, 324; quod tamen loquendi genus huic loco non satis convenit): hebraismus est. (!!) Non male fuit affectus hic locus, nisi ab ipsis editoribus; legendi erant scripti.≫ Vult itaque vir doctus, conjecturis suis non minus fidei tribui, quam libris scriptis: nam ad hos provocat, quum illas venditet. Nunc video, Ill. Ernesti emendationem Lefeb. adsensu suo comprobasse, ut sensus sit: _dat n. m. A._ inspirit Romanis, ut deus, ut _Romanam gentem_, h.e. copias suas, _tandem_ aliquando _tuto g. deponant_, meliori ductori regendas tradant, qui veluti in gremio ipsas foveat, iisque melius parcat. Meo qualicunque judicio Silius expressit Maronem Æn. XII, 554, et sola vox _tandem_ spuria est, quam etiam Dausq. et N. Heins. vario modo correxerunt. Ille non male conj. _Romuleam gentem_: hic _R. cladem_, vel _frondem_ (tamquam Romanis solennem), vel _laurum_ (in gremium Jovis Capitolini delatam, de qua vid. not. ad IX, 546), vel denique _laudem_; quod posterius ad vulgatam lect. proxime adcedit. Possis et _famam_, vel _sortem_ tentare. 614. _blando_ Col. cum R. 2. et Ven. ant. _libido_ Oxon. Vulgg. _Libyco fuco_.
Bellandi vetus, ac laudum cladumque quieta Mente capax; par ingenium castrisque togæque.≫ Sic genitor Divum, recipitque ad sidera gressum.
616. _Bellandi vetus_, vid. ad V, 565. --_laudum_, victoriæ et gloriæ inde redundantis. Vid. ad V, 114. --_laudum capax_, bene ferens ac sapienter res secundas. Cf. Hor. Od. II, x, 21 sq. --_cladum capax_, non fractus calamitatibus, sed iis subficiens, quo sensu etiam XI, 171; _capiunt Cannas_ capit Drak. coll. Sen. Œd. 83; _adversa capere_, et Agam. 31; _cepi nefas_. 617. _par castris togæque_, non minus ad belli, quam ad pacis artes aptum et peritum. _Toga insigne pacis et otii_, Cic. Pis. c. 30.
Hic, circumspectis nulli deprensus in armis, Laudatusque Jovi, Fabius, mirabile quantum 620 Gaudebat reducem patriæ adnumerare reversus, Duxerat egrediens quam secum in prælia, pubem. Nec membris quisquam, natove pepercit amato Acrius; aut vidit socium per bella cruorem Tristior: atque idem, perfusus sanguine victor 625 Hostili, plenis repetebat mœnia castris.
619. _nulli deprensus_, a nullo obpressus inproviso, sic apud Virgil. Æneid. X, 98, _flamina deprensa_, sunt, impedita, intercepta, silvis inclusa (ubi vid. Heyne). Cic. Or. I, 48, et Verr. IV, 12. --_circumspectis in armis_, in bello, quod cautus administrabat: nam _circumspectus_ active dicitur, qui cavendi causa circumspicere solet, et considerate prudenterque agit, adeoque cautus et prudens est. 620. _mirabile_, vel _mirum quantum_, θαυμαστὸν ὅσον, ἀμύθητον ὅσον. Drakenb. laudat Lamb. ad Hor. Od. I, xxvii, 6; Voss. Art. Gram. VII, 19, et Vechner. Hellenol. I, 4, p. 77. 621. _adnumerare_, singulos reddere.
620. _quantum_ Colon. (ex quo Modium male protulisse _tanquam_, docebat N. Heins.) et R. 2, _tantam_ conj. Dausq. Vulgo (_mirabile_) _tantum_.
Stirpe genus clarum, cæloque adfinis origo: Nam remeans longis olim Tirynthius oris, Et triplicis monstri famam, et spectacula captas Mira boves hac, qua fulgent nunc mœnia Romæ, 630 Egit ovans. Tunc Arcadius (sic fama) locabat Inter desertos fundata Palatia dumos Paupere sub populo ductor; quum regia virgo, Hospite victa sacro, Fabium de crimine læto Procreat, et magni commiscet seminis ortus 635 Arcas in Herculeos mater ventura nepotes.
627 sqq. Vid. ad loca simil. I, 278; III, 422, et cf. Virg. Æn. VII, 659 sq., et VIII, 201... 279. 629. _triplicis monstri famam_, h. est, boves, quibus Geryon famam sibi paraverat, et maxime gloriabatur. --_captas boves_, vid. ad III, 39, in V.L. 630. Cf. Ovid. A. A. III, 113... 120; Fast. VI, 261, et Heyne ad Virg. Æneid. VIII, 348; ad Tibull. II, v, 23. 631. Intell. Evander, ex Arcadia profugus, et gente Pelasgica oriundus, qui Pallanteum arcem in monte Palatino condidit, de quo vid. Heyne Exc. I; ad Virg. Æn. VIII, 51; Stroth. ad Liv. I, 5. --_sic fama_, ut passim. Vid. Drak. 632. _Palatia_, mœnia. 633. _Paupere sub populo_. Conf. Virg. Æn. VIII, 100 et 105; vid. ad II, 3. --_regia virgo_, Vinduna. 634. _Hospite sacro_, ab Hercule. --_victa_, vitiata. --_crimine_, stupro, ut alias _peccatum_. Vid. Drak. 636. _Arcas_, puella Arcadica. --_ventura_, futura, vel ut ἔρχεσθαι et _ire_ v.c. _in nomen_ alicujus ap. Virg. Æn. VI, 758, al.
634. _læto_, non _læta_, Col. et R. 2, _feta_ malebat N. Heins.
Ter centum domus hæc Fabios armavit in hostem, Limine progressos uno; pulcherrima quorum Cunctando Fabius superavit facta, ducemque Hannibalem æquando: tantus tunc, Pœne, fuisti! 640
637, 638. Cf. ad II, 4. --_hostem_, Veientes. 639. _Cunctando_, cf. Virg. Æn. VI, 847. De sapienti ejus cunctandi consilio bene disputat Polyb. III, 89. 640. Tantus eo tempore fuisti, o Hannibal, ut Fabius Max. cunctando, teque detinendo, et se tibi æqualem imperatorem demonstrando, egregia CCC Fabiorum facinora superasse judicatus sit, Drak. Quæ Hannibal ipse de Fabio senserit, docet Liv. XXII, 12. --Withof. existimabat Silium non spec. adloqui Hannibalem, sed Pœnos, hoc sensu: Tantus nunc, o Pœne, fuisti, ut æquare Hannibalem, Fabii summa laus fuerit. At quis nunc es? quæ rerum vices?
640. _tunc_, non _nunc_, scripti et R. 2, _Hannibalem: quantus tunc, Pœne, fuisti_ conj. Dausq.
Dum se perculsi renovant in bella Latini, Turbatus Jove, et exuta spe mœnia Romæ Pulsandi, colles Umbros atque arva petebat Hannibal, excelso summi qua vertice montis Devexum lateri pendet Tuder, atque ubi latis 645 Projecta in campis nebulas exhalat inertes, Et sedet ingentem pascens Mevania taurum,
641. Hannibal post pugnam ad Trasymenum lacum per Umbriam agrumque Picenum in Campaniam exercitum ducit: de quo itinere ejusque causis vid. Liv. XXII, 9, et Polyb. III, 86. 642. _Turbatus Jove_, ejus fulmine. Vid. ad v. 595 sq. 645. _Tuder_, vid. ad IV, 222. --_pendet_, ut ap. Virg. Ecl. I, 77, et Æn. I, 106, 166; cf. ad I, 128. Oppos. est v. 647 _sedet_, h.e. in planitie et depressa valle jacet, ut VIII, 507, et XII, 162. Ἡμένῳ ἐν χώρῳ (sed εἱμένῳ ἐν χόρτῳ in edit. Reisk.) Theocr. XIII, 40; monente D. Heins. _Jacentia et plana urbs loca_ dixit Tac. Hist. I, 86. Cf. Broukh. ad Tibull. I, iii, 67. [646.] _Projecta_ propter situm humilem et depressum, Drak. Sed ita locus languet, quia sequitur _sedet_, quo satis declaratur oppositio. --_Projecta_ autem loca et res plerumque dicuntur, quæ vel in altum eminent, vel, ut h.l. longe lateque extenduntur, quæ et _porrecta_ vocantur. Vid. Heins. ad Virg. Æneid. X, 587, et Burm. ad Val. Fl. VIII, 90. [647.] De _Mevania_, vid. ad IV, 544 sq. --_nebulas exhalat inertes_, propter naturam vallium. _Qua nebulosa cavo rorat Mevania campo_, Prop. IV, i, 123.
643. _Pulsando_ Colon. 644. _summi_, non _summum_, Colon. quod recepi cum Drakenb. suadente N. Heins. qui et _Devexum lateris_ volebat, ut _adtonitus serpentis_ et mille talia apud Silium. Sed _devexum lateri_, h.e. in latere, ut _d. jugo_ VIII, 360. 645. _lætis campis_, ut VIII, 456, suspic. N. Heins. et Drak. Vulgata ex IV, 545, defendi potest, etsi τό _lætis_ præstiterit, quoniam cum _projecta_ jungitur. 646. _Porrecta_ suspicari possis: vid. tamen not.
Dona Jovi: tum Palladios se fundit in agros Picenum dives prædæ; atque, errantibus armis, Quo spolia invitant, transfert populantia signa; 650 Donec pestiferos mitis Campania cursus Tardavit, bellumque sinu indefensa recepit.
648. _Dona Jovi_, victimam, quæ ei solebat mactari. Cf. V.L. _Palladios agros_, Picenum agrum oliviferum. Vid. Plin. XV, 3, extr. et sup. ad I, 238. --_se fundit_ Hannibal cum toto exercitu. Vid. ad II, 151. 650. Quas Hannibal terras petierit, relicto agro Piceno, memorat Liv. XXII, 9, et 13. 651. _mitis_ et ad agrorum fertilitatem, et ad aeris temperiem spectat. 652. _sinu_, ut IV, 34.
649. _dives p._ ex scriptis et priscis edd. restituit N. Heins. refrag. Lefeb. qui _dites_ edidit, ut conveniat verbis Livii XII, 9, pr. _Picenum agrum refertum præda, quem effuse avidi atque egentes_ rapiebant. Eandem lect. firmant Polyb. III, 86, extr. et Appian. b. Hannib. c. 12, init. et, quod Ill. Ernesti monet, qui se primum fundit in agros populandi et prædandi causa, nondum dives est prædæ, si subtiliter disputare velimus: etsi consequens etiam pro anteced. passim ponitur. Vulgg. _cupidus prædæ_ primus dedit Nicander, eandem forte Livii auctoritatem secutus, judice Drak. qui tamen, quod omnes libri prisci exhibent, non mutare ausus est: quod nunc forsan, si etiamnunc viveret, fecisset, ut effugeret certe censuram Lefeb. qui satis modeste suo, non Gallico, more pronuntiat, eum in textu absurdissimum esse, et in notis (in quibus tamen nihil præter ea, quæ dixi, continetur) prope delirare.
Hic dum stagnosi spectat templumque domosque Literni ductor, varia splendentia cernit Pictura, belli patribus monimenta prioris 655 Exhausti (nam porticibus signata manebant), Quis inerat longus rerum et spectabilis ordo.
653. In porticibus templi Liternensium bellum Punicum I tabulis expressum fingit poeta, ut Trojanum Carthagine in templo Virg. Æn. I, 453 sq.; vid. ad III, 32. Silius autem ad historiam belli, cum eo, quod describit, arto vinculo connexi, inserendam, egregie hoc poetarum artificio utitur, et sapienter quidem h.l., ubi ad argumentum picturæ oculis animoque perlustrandum otium fecit Hannibali, qui, dum Romani bello vires reparant, totam fere Italiam pervagatur. Simili artificio sup. II, 395 sq. originem Carthaginis, et b. Punicum I, argumenta clipei fecerat. Ceterum porticus (vid. c. Octavia et Philippi apud Plin. XXXV, 10, 40; XXXVI, 5.) picturis ornari solebant. 654. _Liternum_, (vid. V.L.) urbs Campaniæ, ad ostium Clanii fl., qui et ipse _Liternus_ vocatur, (vid. ad VIII, 535) inter Cumas et Vulturnum sita, quo deducta est colonia Romana (Liv. XXXII, 29; XXXIV, 45), et ubi Scipio Afric. invidiæ cedens mortem obiit, teste Liv. XXXVIII, 52, 53. Adjacent paludes et stagna, ex frequenti potissimum Clanii exundatione orta, unde h.l. _stagnosi_. Cf. VII, 278; VIII, 530. Stat. Silv. IV, iii, 66, et Liv. XXII, 16. _Literna palus_ nunc _Lago di Patria_ dicitur, si fides habenda Leandro in Italia. Plura de hoc oppido vid. ap. Cluver Ital. ant. IV, 2, p. 1097. 656. _Exhausti_, ut apud Virg. Æn. IV, 14; X, 57.
654. _Literni_, non _Linterni_, Col. h.l. et inf. VII, 278, et VIII, 531: Λείτερνον dicitur Ptolem. Λίτερνον Strab. V, p. 168; Appian. B. Civ. I, 39, et sic quoque in tabula Peuting. et in optimis exemplarr. Livii, Frontini. Plin. III, 5, Festi et al. Cf. Heins. ad Ovid. Met. XV, 714, Sigon. ad Liv. XXII, 16.
Primus bella truci suadebat Regulus ore, Bella neganda, viro si noscere fata daretur! At princeps Pœnis indicta more parentum 660 Appius adstabat pugna, lauroque revinctus Justum Sarrana ducebat cæde triumphum.
658. Romani diu deliberantes postremo auxilium Mamertinis contra Pœnos et Hieronem ferendum decernebant A.U. 490, et Appius Claudius Caudex Consul populi suffragiis Messanam trajicere jubebatur, de quo b. Punici I initio vid. Flor. II, 2, et inpr. Polyb. I, 10, 11; quo teste populus, senatu dissuadente, hujus consilii, cum recta ratione pugnantis, auctor fuit. Silius tamen non male Regulo has partes tribuit. Patresque idem censuisse tradit Liv. Epit. XVI. --_truci ore_, cf. v. 429. 659. _neganda_, quæ dissuadenda erant. --_viro_, homini. --_Bella suadebat_; quomodo hoc pictura effingi potest? vid. ad II, 417. 660... 662. Appius primum Hieronem, deinde Pœnos vicit. Vid. Polyb. I, ii, 12. --_indicta more parentum_ per fecialem. --_cæde_, propter et post cædem. --_Sarrana_, Pœnorum. Vid. ad I, 72. --_triumphum_, de quo vid. Eutrop. II, 10.
659. _si nosci fata darentur_ R. 3, et Med. _nascere_ R. 2. 660. _indicta pugna_, non _indictæ pugnæ_, Col. et R. 2; _indicta pugnæ_ Ox. 661. _laurosque_ R. 2, lapsu felici, si lapsus est, nec potius genuina lectio.
Æquoreum juxta decus, et navale tropæum, Rostra gerens, nivea surgebat mole columna:
663. Victoria C. Duilii Cos. qui _ante omnes_ h.e. primus _alto_, in mari Siculo, ad Liparas ins. usu ferrearum manuum et corvorum, A.U. 494. Pœnos devicit, et triumphum navalem egit, (vid. Flor. II, 2, et Polyb. I, 22, 23; qui tamen cap. 21 memorat, Romanos paulo ante bis, et primum quidem duce Cn. Cornelio Cos. male, sed mox eo capto, prospere adversus Hannibalem in mari pugnasse) tam grata fuit Romanis, ut _columna_ ipsi _rostrata_ in foro poneretur. Ejus basin olim in Capitolinis urbis ruinis repertam, et inscriptionem doctissime a Pet. Ciacconio in singulari comment. suppletam atque illustratam fuisse, quis est qui nesciat? Hoc antiquissimum veteris ævi monimentum exhibent Lips. antiq. lectt. II, 14; Beger. Duker. et Græv. ad Flor. II, 2; Gruter. p. 404; Fleetwood Inscr. antt. Sylloge p. 66, et Funcc. de orig. et puerit. L. Lat. c. 5, p. 298 sq. Columnam ævo suo etiamnum superfuisse tradit Plin. XXIII, 5, et XXXIV, 5. 664. _nivea mole_, candido marmore. --_surgebat_, doctius quam erat, ut ap. Virg. Ge. III, 29; Æn. I, 448; X, 476; Ovid. Met. I, 44.
664. _ferens_ Put. _niveæ columnæ_ legendum, et post τό _columnæ_ distinguendum videbatur N. Heins.
Exuvias Marti donumque Duilius, alto 665 Ante omnes mersa Pœnorum classe, dicabat: Cui, nocturnus honos, funalia clara, sacerque Post epulas tibicen adest; castosque penates Insignis læti repetebat murmure cantus.
667... 669. Eidem Duilio perpetuus honos habitus, vel potius, teste Catone ap. Cic. de Sen. c. 13, ab ipso privato, nemine prohibente, sumtus est, ut revertenti a cœna, tibicine canente, funalia præferrentur, et ipse quasi quotidie ita triumpharet. Conf. Flor. II, ii, 10; Plin. XXXIV, 5; Liv. Epit. XVII; Val. Max. III, vi, 4. Verba _castos penates_ spectant, ni fallor, ad Duiliam uxorem, quæ vel ea, qua vixit, ætate, exemplar pudicitiæ fuit. Vid. Hieron. advers. Jovian. I, et Merula ad Ennii Fragm. p. 57.
665. _Duellius_ Put. Vulgo _Duillius_ Sed _Duilius_ Med. ed. ut in fastis triumphal. et Gr. Δουΐλιος. Aliis Bellius, Billius, Βίλιος, Λίβιος dicitur. Confer VV. DD. ad Polyb. I, 22 et 24. Pighius ad A.U. CDXCIII. et, quos Drak. jam laudavit, Merula ad Enn. Ann. I, p. 59, et inprim. Ciaccon. ad column. rostrat. 669. _læto_ Benes.
Cernit et extremos defuncti civis honores: 670 Scipio ductoris celebrabat funera Pœni, Sardoa victor terra. Videt inde ruentem Litoribus Libycis dispersa per agmina pubem; Instabat crista fulgens, et terga premebat Regulus: Autololes, Nomadesque, et Maurus, et Hammon, 675 Et Garamas positis dedebant oppida telis.
670. Hæc de exsequiis, quas L. Cornelius Scipio, Barbati filius, qui, Olbia urbe capta, A. U. 494, de Pœnis, Sardis Corsisque triumphavit, Hannoni in Sardinia cæso fecit, recte intelligunt Marsus, Cell. et Drak. Cf. Flor. II, 2; Liv. Epit. XVII, et inpr. Valer. Max. V, i, 2. 672... 676. Cf. sup. ad v. 299 sq.
671. _celebraret_ Col. unde _Cernit ut... celebraret_ scribendum putabat N. Heins. 674. _effulgens_ R. 3.
Lentus arenoso spumabat Bagrada campo Viperea sanie, turmisque minantibus ultro Pugnabat serpens, et cum duce bella gerebat.
677... 679. Cf. v. 140 sq.
678. _turmisque minantibus_ scripti et priscæ edd. ante Junt. in qua primum operarum vitio editum _turmisque minitantibus_, pro quo _turmis minitantibus_ reposuit Aldus, quem secuti sunt alii. _Ultor_ malebat N. Heins. quod verbis Flori II, 2, _quasi in vindictam Africæ nata serpens_ convenire notat Drak. qui tamen τό _ultro_ servat, et coll. XI, 517, pro _insuper_, ut Lef. cum emphasi, ut apud Virg. passim, et apud alios _insuper_, vel _volens_, positum existimat. Equidem malim interpretari _adeo_, _sogar_, quæ notio plerisque, ubi _ultro_ occurrit, locis respondet. [“XI, 517” recte XI, 515]
Nec non projectum puppi, frustraque vocantem 680 Numina, Amyclæum mergebat perfida ponto Rectorem manus, et seras tibi, Regule, pœnas Xanthippus digni pendebat in æquore leti.
680. Pœnos, gloriæ Xanthippi invidentes, eum navi redeuntem mersisse, memorant, præter Silium, ab aliis jam laudati Appian. de reb. Pun. c. 4, et Zonaras Annal. T. II, quo teste fuerunt etiam, qui eum in desertam insulam expositum, et alii, qui navem ei vetustate fatiscentem datam fuisse, referrent. Eumdem vero incolumem potius domum rediisse, tradit testis fide dignior Polyb. I, 36. 682. _seras_, quia jam captus eras.
680. _e puppi_ volebat N. Heins. 682. _Rectorem_ scripti et R. 2. Vulgata lectio _Xantippum_ e marg. in contextum inrepsit. 683. _Indigno rector pendebat_ R. 3. Parm. et Med. quæ lectio ex emendatione profecta videtur, ne idem nomen, ut vulgo fit, repetatur.
Addiderant geminas medio consurgere fluctu Ægates; laceræ circum fragmenta videres 685 Classis, et effusos fluitare in gurgite Pœnos.
684. Conf. ad I, 61. --_geminas_; vulgo tres putant esse, ejusdemque fere magnitudinis, et Lilybæo promont. objectas, _Phorbantiam_, _Ægusam_ et _Hieram_, quæ post Usticam et Osteodem a Ptolemæo memorantur, et tres Ægates esse creduntur. Quod si verum est, Silius forte _geminas_ dixit pro _duas_, innuitque τὴν Αἴγουσαν νῆσον et τὴν Ἱερὰν νῆσον, quarum mentionem facit Polyb. I, 60 et 61, ubi de pugna Lutatii et Hannonis agit, quæ primum Punicum bellum confecit. --_Addiderant_ pictores. 685. _Ægates_, Αἰγούσας ap. Polyb. I, 45.
686. _affusos_, scilicet fragmentis navium, vel remis, emend. N. Heins. Cf. ad IV, 251. Idem prob. Drak. et recepit Lefeb. Non male: sed in vulg. quoque lect. _effusos_ (h.e. vagos, dispersos, vel effuse) nihil esse video, quod displicere debeat.
Possessor pelagi, pronaque Lutatius aura Captivas puppes ad litora victor agebat.
687. _aura prona_, vento favente et secundo, vel celeri, quo cursus fiebat pronus ac celer, ut ap. Hor. Od. I, xxix, 11; IV, vi, 39, et Virg. Æn. V, 212; teste Polyb. ll. cc. Pœnis potius, tam in prælium euntibus, quam, eo finito, Hieram ins. repetentibus, subita mutatione, secundus fuit ventus; et Lutatius, L navibus demersis et LXX captis, cum decem fere millibus vectorum Lilybæum promont. petiit.
687. _pronaque Lutatius a._ scripti et priscæ edd. _pronaque Luctatius_ Veneta Marsi. Vulgata lectio _prona Luctatius_ debetur Nicandro. _Lutatium_ scribi in unico hujus gentis numo ap. Ursin. in familiis Rom., et primam a poetis syllabam corripi, sed in corpore Gruteri et Reinesii utramque orthographiam inveniri, monet Drak. qui laudat Heins. ad Claud. in Eutrop. I, 455; Carrion ad Sallust. Hist. I, p. 453, ed. Gruteri, et Fabrett. Inscriptt. p. 675 et 750. Præterea nostram scripturam confirmant Græci: nam Λυτάτιος dicitur Polyb. I, 59 sqq. et Λουτάτιος Appiano de reb. Sic. II, Exc. 18, T. I, p. 93. ed. Schweigh.
Hæc inter, cinctus legatorum ordine Hamilcar, Ductoris genitor, cunctarum ab imagine rerum 690 Totius in sese vulgi converterat ora.
689. _Hæc_ omnes scripti et edd. ante Drak. _victos_ Colon. _junctos_ Oxon. _vincto_ Parm. et Med. _religatus in ordine_ scripti cum R. 3, Parm. et Med. Vulgata lectio _juncto legatus in ordine_ auctorem habet Marsum, qui _in ordine_ pro _continuo_ dictum putabat. _Hic inter victos religatus in o. H._ conj. Dausq. prob. N. Heins. nisi quod, _Hoc... in ordine_, scilicet captarum navium, maluerit. Id recepit Drak. qui tamen recte jam monuit, alto historicorum de captivitate Hamilcaris (qui ne pugnæ quidem navali interfuit) silentio auctoritatem librorum plerorumque infringi, nisi forte hæc verba cum Dausq. ad imaginem Hamilcaris, quam Romani in triumpho religatam gestarint, referantur, de quo conf. XVII, 630 sqq. inpr. v. 644, 645. Mira hæc videtur oscitantia Lefeb. qui _Hoc, inter victos Legatus, in o. H._ reposuit, addita hac nota: ≪Non _capti_, sed ad incitas adacti milites Hamilcaris, cujus _arbitrio_, ait Nepos, _pacem permiserat_ Carthago. Ideo dicitur a poeta _legatus_, constitutus quidem, non missus: id est, _plenipotentiaire_, german. _gevollmachtigt_, quod nemo ante me animadvertit.≫ Nihil horum omnium satisfacit, et ipse quoque receptam textus lectionem deserendam putavi, etsi ab ea discedere, ubi aliquam certe veri speciem habet, religioni duco. Sententia verborum, quæ ex vestigiis librorum, donec meliora certioraque quis suggesserit, reposui, hæc est: _Inter hæc_, scilicet tabularum argumenta (ut _inter ea_ dixit Virg. Æn. I, 479) _Hamilcar_, dux, non legatus, Pœnorum in Sicilia, cujus tamen arbitrio hi pacem, cujus mox mentio fit, permiserant, _cinctus ordine legatorum_, h.e. decem legatis, ex ordine tabula expressis, quos Romani, pacis conditionibus, quas Lutatius dixerat, rejectis ad eum miserant, teste Polyb. I, 62 et 63, _converterat_, etc. Possis etiam eodem sensu legere _junctus legatorum ordini_, vel _ordine_: nisi malis _picto legatorum ordine_. Viderint acutiores. 690. _junctarum_ conj. N. Heins. et v. 692, _Sed pacti faciem_, vel _Sed pacti auspicium_, ut verba _pacti fœderis_ jungantur; _faciem_ scripti et Parm. _faciens_ Med. Vulgo _facies_, adversante metro. _Pacis_ majore litera initiali scripsi, quia ipsam _Pacis faciem_, h.e. imaginem pictura expressam puto, ut _aras_, _Jovem_ et _Latinos_.
Sed pacis faciem, et pollutas fœderis aras, Deceptumque Jovem, ac dictantes jura Latinos Cernere erat: strictas trepida cervice secures Horrebat Libys, ac submissis ordine palmis 695 Orantes veniam, jurabant inrita pacta. Hæc Eryce e summo spectabat læta Dione.
692. Ornatum verborum et ferocem illum excelsumque, qui in iis vivit et regnat, spiritum Romanum facile percipias. De ipsa pace, vid. Polyb. I, 62 et 63. --_faciem_, Drak. exponit genus, ut IV, 591; Sed vid. V.L. 693. _Jovem Deceptum_, ut I, 482. Cf. ad I, 9. --_jura_, ut I, 481. 695. _submissis palmis_, vid. ad I, 673. 696. _inrita_ mox futura, moto scilicet bello Punico secundo. 697. Præclare Venus, quæ Romanis favet, hisce picturis oculos animumque pascere fingitur. --_Dione_, Venus: vid. ad IV, 106. Nobilissimum ejus templum in _Eryce_, monte Siciliæ, supra Drepanum. Vid. Heyne in not. et Exc. II; ad Virg. Æn. V, 759.
695. _Horrebant Libyes_ contra fidem libb. dedit Lefeb. vulgare substituens exquisitiori. 696. _horrida pacta_ edd. antt. _inrita pacti_ malebat N. Heins. ut _acuta belli_, _dura laborum_, etc. |
|
댓글 없음:
댓글 쓰기